Astarada toqquşan maşınlar arxa düşdü, qadın sərnişin yaralandı - VİDEO

Astara rayonunda xəsarətlə nəticələnən yol-nəqliyyat hadisəsi baş verib.

Avtosfer.az-ın məlumatına görə, qəza oktyabrın 31-də saat 14:00 radələrində rayonun Pensər kəndində qeydə alınıb. Belə ki, hərəkətdə olan “Skoda” markalı avtomobil “Geely” markalı nəqliyyat vasitəsi ilə toqquşub.

Zərbənin təsirindən hər iki avtomobil yol kənarındakı arxa düşüb. Hadisə nəticəsində nəqliyyat vasitələrinə ciddi maddi ziyan dəyib, “Geely”də olan qadın sərnişin isə müxtəlif dərəcəli bədən xəsarətləri alıb. Yaralı xəstəxanaya çatdırılıb.

Hadisə yerinə polis əməkdaşları cəlb olunub. Qəzanın başvermə səbəbləri araşdırılır.

Nərmin