Çaya düşən sürücünün maşından çıxarılması gündəm oldu – ANBAAN VİDEO

Çində filmləri xatırladan hadisə yaşanıb. Belə ki, Jiangsu əyalətinin Taizhou şəhərində sürücü idarəetməni itirərək avtomobili ilə çaya düşüb.

Avtosfer.az xəbər verir ki, hadisə anı ərazidə olan təhlükəsizlik kameralarına və mobil telefonlara əks olunub.

Görüntülərdə avtomobilin suda batmaq üzrə olduğu görünür. Bu zaman yaxınlıqdakı kran operatoru tərəddüd etmədən suya atılaraq sürücünü xilas etməyə çalışıb. O, əlindəki daşla avtomobilin lyukunu sındıraraq içəridə sıxılmış sürücünü çıxarmağa nail olub.

Ətrafdakı vətəndaşlar da hadisəyə reaksiya verərək xilasetmə işinə qoşulublar. Onlar sürücünü sahilə çıxarıb təcili tibbi yardıma təhvil veriblər. Yaralı sürücü xəstəxanaya çatdırılıb və vəziyyətinin sabit olduğu bildirilir.

Hadisənin ən diqqətçəkən məqamı isə sürücünün ölümlə üz-üzə qaldığı anda belə telefonunu əldən buraxmaması olub. Videoda onun avtomobil batarkən belə telefonu yerə qoymadığı açıq-aşkar görünür.

Bu hadisə sosial şəbəkələrdə geniş müzakirələrə səbəb olub və bir çox istifadəçi sürücünün davranışını həm təəccüblə, həm də tənqidlə qarşılayıb.

Eltac Zülfüqaroğlu