Maşının arxasından qəfil əks yola çıxan sürücü qorxulu anlar yaşatdı - VİDEO

Paytaxtın Xəzər rayonu, Şüvəlan qəsəbəsində qaydalarını kobud şəkildə pozan sürücü kameraya düşüb.

Avtosfer.az-ın məlumatına görə, hadisə iyulun 25-də saat 20:12 radələrində qeydə alınıb.

Kadrlardan görünür ki, 90-YE-854 dövlət nömrə nişanlı “Chevrolet Cobalt” markalı avtomobilin sürücüsü təhlükəli manevr edib. Belə ki, o, hərəkətdə olan nəqliyyat vasitəsinin arxasından qəfil əks istiqamətli yola keçərək qarşıdan gələn avtomobilin hərəkət trayektoriyasına daxil olub. Nəticədə təhlükəylə üzləşən sürücü ehtiyatlı davranaraq baş verəcək qəzanın qarşısını alıb.

Görüntülərdən də aydın olur ki, qayda pozuntusuna yol verən sürücü manevr etməzdən əvvəl yolun təhlükəsizliyinə əmin olmayıb və bununla da digər hərəkət iştirakçısı üçün qəza riski yaradıb.

Qeyd edək ki, qanunvericiliyə əsasən, sürücü hər hansı manevrə başlamazdan əvvəl onun təhlükəsiz olduğuna və digər hərəkət iştirakçılarına maneə yaratmayacağına əmin olmalıdır.

Nərmin