Kondisionerdən istifadə edən ürək xəstələrinə XƏBƏRDARLIQ

Mütəxəssislər isti havalarda kondisionerdən düzgün istifadə etməyin vacib olduğunu bildiriblər. Avtosfer.az “Axşam.az”a istinadən xəbər verir ki, kardioloqlar həddindən artıq isti havadan qorunmaq üçün istifadə edilən kondisionerlərin ürək xəstələri üçün risk yarada biləcəyini vurğulayıblar. Həkimlərin sözlərinə görə, tərləyən halda qəfil buz kimi soyuq mühitə daxil olmaq və ya isti havada soyuq suya girmək ürəkdə ritm pozuntularını tətikləyə bilər. Mütəxəssislər bədənin ani temperatur dəyişikliklərindən qorunmasının vacibliyini qeyd edərək, otaqların tədricən soyudulmasını tövsiyə edirlər. Xüsusilə ürək xəstələrinə kondisioneri 17 dərəcə kimi çox aşağı temperaturda işlətməmək və cihazın qarşısında yatmamaq məsləhət görülür. Həkimlər orqanizmin uyğunlaşması üçün optimal otaq temperaturunun seçilməsinin və isti-soyuq keçidlərinin yavaş həyata keçirilməsinin vacib olduğunu bildirirlər.