Kondisioneri belə işlədəndə işıqpulu az yazır

Yay fəslinin gəlişi və havaların isinməsi ilə evlərdə, ofislərdə kondisionerlər fasiləsiz işləməyə başlayır. Bir çox insan cihazı işə salan kimi dərhal ən aşağı temperaturu seçsə də, əslində çox sadə bir gedişlə həm cihazın ömrünü uzatmaq, həm də işığına qənaət etmək mümkündür. Avtosfer.az "Demokrat.az"a istinadən xəbər verir ki, cihazı birbaşa soyutma (Cool) modunda yox, əvvəlcə bir neçə dəqiqəlik "Fan" rejimində işlətmək lazımdır. Bu kiçik prosedur otaqdakı durğun və qızmar havanın kütləsini dağıdır və temperaturun bərabər paylanmasını təmin edir. Beləcə, otaqdakı ilkin ağırlıq aradan qalxdıqdan sonra soyutma sisteminə keçdikdə, kondisionerin kompressoru həddindən artıq gücə düşmür. Bu üsul sayəsində cihaz hədəf seçilən dərəcəyə daha sürətlə çatır və elektrik enerjisi sərfiyyatı nəzərəçarpacaq dərəcədə azalır. Həmçinin ventilyasiya rejimi daxili hava axınını tənzimlədiyi üçün filtrlərdə tozun yığılmasının qarşısını alır. Bu da tənəffüs yolları həssas olan şəxslər və allergiyası olanlar üçün daha sağlam mühit deməkdir. Maksimum səmərəlilik üçün filtrlərin mütəmadi yuyulması və otaq temperaturunun 22-24 dərəcə civarında saxlanılması tövsiyə olunur. Eyni zamanda kondisioner işləyərkən pərdələri bağlı saxlamaq günəş şüalarının otağı isitməsinə imkan vermir. Pultdakı bu kiçik düymə dəyişikliyi ayın sonunda ödəniş fakturasında özünü aydın şəkildə büruzə verir. Yəni, kondisioneri dərhal soyutmaya qoymaq əvəzinə, əvvəlcə bir neçə dəqiqə yelçəkən (fan) rejiminə salmaqla həm otağı tez soyutmaq, həm də elektrik puluna qənaət etmək olar.