Rüşvəti trendə çevirib viral etdilər – Rekord say təhlükə saçır...

Sosial mediada, xüsusilə də TikTok və Instagram platformalarında son günlərdə sürətlə yayılan “rüşvət trendi” cəmiyyətdə müzakirələrə səbəb olub.

Avtosfer.az “Yeni Sabah”a istinadən xəbər verir ki, “Al bu pulu, filan məsələdə işin olmasın” kimi ifadələrlə başlayan qısa videolar minlərlə baxış toplayaraq viral xarakter alıb.

Trendin əsas məğzi müxtəlif məişət və ya iş situasiyalarını zarafat formatında təqdim edərək, problemi “pul verib həll etmə” mesajı üzərindən qurmaqdır. İstifadəçilər bunu yumor kimi təqdim etsələr də, cəmiyyətdə belə məzmun rüşvət anlayışını adiləşdirmək və cəmiyyət şüurunda onun təhlükəliliyini kölgədə qoymaq riski daşıyır.

“Zarafat” adı altında təhlükəli mesaj

Hüquq müstəvisində rüşvət cinayət əməlidir və onun hər hansı formada normallaşdırılması gələcək nəsillərin hüquqi şüuruna mənfi təsir göstərə bilər. Sosial şəbəkələrdə geniş auditoriyaya çıxışı olan kontent istehsalçılarının məsuliyyətli davranması vacib hesab olunur.

Psixoloji cəhətdən isə tez-tez təkrarlanan zarafatlar müəyyən davranış modellərini şüuraltı səviyyədə “qəbul edilən” hala gətirə bilər. Bu da xüsusilə yeniyetmələr arasında rüşvətin ciddiliyinin azalmasına səbəb ola bilər.

Hüquqi və sosial məsuliyyət çağırışı

Ekspertlər hesab edirlər ki, sosial media platformalarında yayılan bu tip trendlərə qarşı maarifləndirici yanaşma gücləndirilməlidir. Rüşvətin yalnız fərdi deyil, ümumilikdə cəmiyyətin ədalət prinsiplərinə zərbə vurduğu vurğulanır.

Mövzu ilə bağlı ictimai müzakirələrin artması isə göstərir ki, sosial şəbəkələrdə yayılan hər trend sadəcə əyləncə elementi kimi qiymətləndirilməməlidir. Xüsusilə hüquq pozuntularını zarafata çevirən kontentlərə qarşı həm ictimai, həm də platforma səviyyəsində daha həssas yanaşma tələb olunur.