Şəhid ailələri metrodan ödənişsiz istifadə edə bilmirlər? - RƏSMİ

Sosial şəbəkədə "Bakı Metropoliteni" QSC-də şəhid ailələrinin metrodan ödənişsiz istifadə hüququnun məhdudlaşdırıldığı və ya ləğv edildiyi iddia edilir.

Qeyd olunur ki, şəhid ailəsi üzvlərinin metroya daxil olarkən təqdim etdikləri müvafiq vəsiqələr artıq keçərli sayılmır və bu qərar rəhbərliyin göstərişi əsasında tətbiq edilir.

Mövzu ilə bağlı "Bakı Metropoliteni" QSC-dən bildirilib ki, metropolitendən ödənişsiz istifadə etmək hüququ olan sərnişinlərin əhatə dairəsi və bu hüququn əsasları aşağıda qeyd olunan qanunvericilik aktları ilə müəyyən edilib.

Belə ki, Nazirlər Kabinetinin 19 oktyabr 2010-cu il tarixli 179 nömrəli qərarı ilə təsdiq edilmiş "Bakı Metropolitenindən İstifadə Qaydaları"nın 4.1.1-ci bəndinə əsasən, sərnişinlər yeddi yaşınadək uşaqlara görə gediş haqqı ödəməmək hüququna malikdirlər.

"Xidməti vəzifələrinin icrası zamanı polis əməkdaşları - "Polis haqqında" Qanunun 38-ci maddəsinin IV hissəsinə əsasən, xidməti vəzifələrinin icrası zamanı polis əməkdaşları ölkə ərazisində sərnişin nəqliyyatının bütün növlərindən (taksidən və şəhərlərarası nəqliyyatdan başqa) pulsuz istifadə etmək hüququna malikdirlər;

- müddətli həqiqi hərbi xidmət hərbi qulluqçuları - "Hərbi qulluqçuların statusu haqqında" 25 dekabr 1991-ci il tarixli 36 nömrəli qanunun 6-cı maddəsinə görə müddətli həqiqi hərbi xidmət hərbi qulluqçuları sərnişin nəqliyyatının bütün növlərindən (taksidən başqa) pulsuz istifadə edirlər.

3 oktyabr 1997-ci il tarixli, 377-IQ nömrəli qanunla təsdiq edilmiş "Hərbi xidmətkeçmə haqqında" Əsasnamənin 4-cü bəndinə, "Hərbi vəzifə və hərbi xidmət haqqında" 23 dekabr 2011-ci il tarixli 274-IVQ nömrəli Qanunun 28.2-ci maddəsinə görə, müddətli həqiqi hərbi xidmət keçən hərbi qulluqçulara qanunla müəyyən edilmiş müddətlər daxilində həqiqi hərbi xidmət keçən əsgərlər, matroslar və çavuşlar aiddirlər", - məlumatda deyilir.

Beləliklə, qanunvericilikdə şəhid ailələrinin metrodan ödənişsiz istifadə hüququnun nəzərdə tutulmadığı aydın olur./oxu.az