TƏBİB: "Formula-1" günlərində zərurət yarandığı hallarda tibbi xidmətin göstərilməsi təşkil olunacaq

Tibbi Ərazi Bölmələrini İdarəetmə Birliyi (TƏBİB) tərəfindən Bakı Şəhər Halqası Əməliyyat Şirkəti tərəfindən təşkil olunan 2025-ci il "Formula-1" üzrə Azərbaycan Qran-prisi günlərində zərurət yarandığı hallarda tibbi xidmətin göstərilməsi təşkil olunacaq.

Avtosfer.az xəbər verir ki, bu barədə TƏBİB məlumat yayıb.

18-21 sentyabr 2025-ci il tarixlərində baş tutacaq Qran-pridə yaradılan tibb məntəqələrində Bakı Baş Səhiyyə Mərkəzinin nəzdindəki tibb müəssisələrindən 28 həkim-mütəxəssis və tibb bacısının fəaliyyət göstərməsi nəzərdə tutulub.

Eyni zamanda, tibbi xidmətin təşkili istiqamətində Respublika Təcili və Təxirəsalınmaz Tibbi Yardım Mərkəzi, Mərkəzi Neftçilər Xəstəxanası, Kliniki Tibbi Mərkəz, Yeni Klinika, Xətai Tibb Mərkəzi və Sabunçu Tibb Mərkəzinin rəhbərliklərinə müvafiq tapşırıqlar verilib.

Yarış müddətində tibb məntəqələri lazımi tibbi avadanlıq və dərman vasitələri ilə təmin olunacaq.

Tədbirin keçirildiyi müddət ərzində təhkim olunan bütün tibb işçiləri 08:00-dan 00:00-a qədər növbəli xidmət göstərəcəklər.

Qeyd edək ki, TƏBİB 6 ildir Bakı Şəhər Halqası (BŞH) Əməliyyat Şirkəti ilə "Formula-1" üzrə Azərbaycan Qran-prisi çərçivəsində uğurlu əməkdaşlıq edir.