Babək körpüsü yanında yolu qazıb nişan qoymayıblar; sürücülər narazıdır - FOTO

Babək prospektində qazıntı işləri sürücülər üçün təhlükə yaradır.

Avtosfer.az xəbər verir ki, Babək körpüsünün yanında, “Xalqlar Dostluğu” metrosu istiqamətində yol bir neçə gündür hansısa qurum tərəfindən qazılıb. Sakinlərin sözlərinə görə, ərazidə qazıntı aparılsa da işlər tamamlanmayıb və yol əvvəlki vəziyyətinə qaytarılmayıb.

Ən narahatedici məqam isə odur ki, həmin yerdə heç bir xəbərdaredici nişan və ya təhlükəsizlik lentləri qoyulmayıb. Bu da həm gündüz, həm də xüsusilə gecə saatlarında sürücülər üçün ciddi təhlükə yaradır.

Sürücülər bildirirlər ki, bu vəziyyət təkcə avtomobillər üçün deyil, eyni zamanda piyadalar üçün də risklidir. “Yol bir neçə gündür qazılıb qalıb. Heç kim maraqlanmır, xəbərdaredici nişan da yoxdur. Gecə vaxtı həmin yerdən keçmək çox təhlükəlidir”, – deyə sürücülər şikayətləniblər.

Sakinlər aidiyyəti qurumlardan Babək prospektində yarımçıq qalmış qazıntı işlərinin tez bir zamanda bərpa olunmasını və ərazidə xəbərdaredici nişanların quraşdırılmasını xahiş edirlər.

Onlar həmçinin sürücülərə müraciət edərək həmin ərazidən keçərkən xüsusi ehtiyatlı olmalarını tövsiyə ediblər.

Eltac Zülfüqaroğlu