“Dəniz Mall”un ətrafına mobillik zolağı çəkilir - FOTO

Paytaxtda velosiped infrastrukturunun genişləndirilməsi istiqamətində növbəti addım atılıb.

Avtosfer.az xəbər verir ki, “Dəniz Mall”un qarşısında velosiped zolağının çəkilişinə başlanılıb.

Ərazidə yol nişanlanması işləri aparılır, xüsusi nişan və yol cizgiləri təşkil edilib. Yeni zolaq həm sahilboyu ərazidə hərəkət edən velosipedçilər, həm də gündəlik olaraq bu istiqamətdən istifadə edən vətəndaşlar üçün nəzərdə tutulub.

Qeyd edək ki, son illər Bakı şəhərində velosiped yollarının mərhələli şəkildə artırılması istiqamətində layihələr icra olunur. “Dəniz Mall” ətrafında salınan yeni zolağın da mövcud şəbəkəyə inteqrasiya ediləcəyi gözlənilir.

Sakinlər və velosiped həvəskarları isə hesab edirlər ki, zolaqların davamlı və bir-birinə bağlı formada təşkili daha effektiv nəticə verə bilər. Layihənin nə vaxt tam başa çatacağı ilə bağlı rəsmi açıqlama verilməyib.

Eltac Zülfüqaroğlu