DYP piyadalara müraciət ETDİ

Daxili İşlər Nazirliyinin Baş Dövlət Yol Polisi İdarəsi (BDYPİ) piyadalara müraciət edib.

Avtosfer.az xəbər verir ki, idarənin müraciətində piyadaların yol hərəkəti qaydalarına ciddi əməl etməsinin vacibliyi vurğulanıb.

Qeyd olunub ki, piyadalar yolu yalnız nəzərdə tutulmuş piyada keçidlərindən keçməli, hərəkət zamanı diqqətli olmalı və tələsməməlidirlər. Yolu keçərkən ətrafa diqqətlə nəzər yetirmək, nəqliyyat vasitələrinin hərəkətini nəzərə almaq və təhlükəsizliyə tam əmin olduqdan sonra keçidi davam etdirmək tövsiyə olunub.

Xüsusilə yolun hərəkət hissəsinə yaxınlaşarkən və onu keçərkən mobil telefon, qulaqcıq və digər elektron cihazlardan istifadə etməklə diqqətin yayındırılmasına yol verilməməsinin vacibliyi qeyd edilib.

BDYPİ sürücülərə də müraciət edərək piyada keçidlərinə yaxınlaşarkən sürəti azaltmağı, piyadalara yol verməyi və diqqəti yayındıran amillərdən çəkinməyi tövsiyə edib.

İdarə bütün hərəkət iştirakçılarını yol hərəkəti qaydalarına ciddi əməl etməyə, qarşılıqlı hörmət və məsuliyyət nümayiş etdirməyə çağırıb.

“Unutmayaq ki, yollarda təhlükəsizlik hər kəsin düzgün davranışından başlayır və bir anlıq məsuliyyətsizlik ağır nəticələrə səbəb ola bilər”, – deyə müraciətdə bildirilib.