DYP uşaqlarla bağlı hərəkət iştirakçılarına MÜRACİƏT ETDİ

Avtomobildə sərnişinlərin, xüsusilə uşaqların daşınması zamanı təhlükəsizlik qaydalarına əməl olunması onların həyat və sağlamlığının qorunması baxımından mühüm əhəmiyyət daşıyır.

Avtosfer.az xəbər verir ki, bu barədə DİN-in Baş Dövlət Yol Polisi İdarəsi yol hərəkəti iştirakçılarına müraciət edib.

Müraciətdə bildirilib ki, hərəkətdə olan avtomobillərdə sərnişinlərin təhlükəsizlik kəmərindən istifadə etməməsi, uşaqların avtomobilin pəncərəsindən bədənlərinin hər hansı hissəsini çıxarması və ayaqüstə dayanması kimi təhlükəli hallara rast gəlinir. DYP qeyd edib ki, ilk baxışdan adi görünən bu davranışlar qəza və ya gözlənilməz vəziyyət zamanı ciddi xəsarətlərə səbəb ola bilər.

İdarə xüsusilə uşaqların daşınması zamanı valideynləri və sürücüləri diqqətli olmağa çağırıb. Uşaqların yaş və çəkilərinə uyğun təhlükəsizlik vasitələrindən, o cümlədən uşaq oturacaqlarından istifadə olunması və təhlükəsizlik kəmərinin düzgün bağlanması vacibdir.

DYP vurğulayıb ki, uşaqların təhlükəsizliyi ilk növbədə böyüklərin diqqət və məsuliyyətindən asılıdır.