Yol polisi zolağı tez-tez dəyişən sürücülərə xəbərdarlıq etdi - Sıxlıq yaradırsınız

Yollarda zolaq intizamına riayət olunması təhlükəsizliyin əsas şərtidir.

Avtosfer.az xəbər verir ki, bu barədə Baş Dövlət Yol Polisi İdarəsi (BDYPİ) sürücülərə müraciətində bildirilib. Məlumatda qeyd olunub ki, yol hərəkəti təhlükəsizliyinin təmin olunması hər bir sürücünün üzərinə düşən mühüm məsuliyyətdir. Xüsusilə hərəkət zolağının düzgün seçilməsi və həmin zolaq üzrə nizamlı hərəkət sürücü intizamının əsas göstəricilərindəndir.

Yolun hərəkət hissəsinin zolaqlara ayrılması nəqliyyat axınının tənzimlənməsi, istiqamətin müəyyənləşdirilməsi və qəza risklərinin azaldılmasında mühüm rol oynayır. Təəssüf ki, bəzi sürücülər nişanlanma xətlərini və digər avtomobilləri nəzərə almadan zolaqları tez-tez dəyişirlər ki, bu da yollarda qarışıqlıq, süni sıxlıq və qəza riski yaradır.

Mütəxəssislərin fikrincə, sürücülər daxil olduqları zolaqda müəyyən edilmiş istiqamət üzrə nizamlı hərəkət etsələr, yollarda axıcılıq təmin olunacaq, sıxlığın qarşısı alınacaq və yol-nəqliyyat hadisələrinin sayı minimuma enəcək.

Baş Dövlət Yol Polisi İdarəsi sürücülərə bir daha xatırladıb ki, zolaq dəyişdirmək yalnız qaydalarla müəyyən olunmuş hallarda və müvafiq dönmə siqnalından istifadə edilməklə icazəlidir. Qurum bütün sürücüləri məsuliyyətli davranmağa, yol hərəkəti mədəniyyətinə hörmətlə yanaşmağa çağırır.

Məlumatın sonunda DYP qeyd edib : “Gəlin, birlikdə sürücü intizamını daha da möhkəmləndirək, yollarımızı daha təhlükəsiz edək.”