Yolun ortasında hədə-qorxu gəlib maşını yumruqladı – Polis araşdırmaya başladı - VİDEO

DİN-in Mətbuat Xidmətinin regional qrupundan Avtosfer.az-a bildirilib ki, görüntülərlə bağlı ərazi üzrə polis orqanında araşdırma aparılır.

*** 12:45

Qəbələ rayonunda sürücülər arasında baş vermiş mübahisə avtomobilin kamerasına düşüb.

Avtosfer.az-ın məlumatına görə, hadisə avqustun 8-də saat 12:25 radələrində rayonun Vəndam qəsəbəsində baş verib.

Kadrlardan görünür ki, 96-BE-909 dövlət qeydiyyat nişanlı “VAZ-2115” markalı avtomobilin sürücüsü əks istiqamətli yola çıxan nəqliyyat vasitəsinin önündə qəfil dayanıb. Daha sonra o, avtomobildən düşərək videonu qeydə alan sürücüyə yaxınlaşıb, “Görmürsən?” ifadəsini dəfələrlə təkrarlayıb və nalayiq sözlər işlədib.

Görüntünü qeydə alan sürücünün sözlərinə görə, o, avtomobili yolun kənarına çəkərək qarşı tərəfə yaxınlaşacağını bildirsə də, “VAZ”ın sürücüsü sakitləşməyib. Əksinə, geri qayıdaraq əl hərəkətləri ilə hədələyib, yenidən sürücüyə yaxınlaşıb təhqiramiz ifadələr işlədib.

Sürücü bildirib ki, hadisə zamanı avtomobildə qadın və azyaşlı uşaq da olub. Buna baxmayaraq, o, dəfələrlə avtomobili yumruqlayaraq aqressiv davranışlarını davam etdirib. Daha sonra o, maşına əyləşərək hadisə yerindən uzaqlaşıb.

Qeyd edək ki, qanunvericiliyə əsasən, əks istiqamətli hərəkət zolağına çıxmaq yalnız qanunvericilikdə nəzərdə tutulmuş hallarda mümkündür. Bununla yanaşı, yol hərəkəti zamanı yaranan hər hansı mübahisə sürücüyə digər hərəkət iştirakçılarını təhqir etmək, hədələmək və ya onların əmlakına zərər vurmaq hüququ vermir. Belə davranışlar qanunvericiliklə məsuliyyət yarada bilər.

Nərmin