Ermənistanda avtomobillər ekologiya üçün fəlakətə çevrilib - Katalizatoru satırlar

Ermənistanda avtomobillər ekologiya üçün fəlakətə çevrilib. Bu barədə “Report” Ermənistan mətbuatına istinadən xəbər verir. Ölkənin Avtomobil İstehsalçılarının Rəsmi Dilerləri Assosiasiyasının sədri Artyom Petrosyan bildirib ki, hökumətin avtomobil katalizatorlarının ixracını qadağan etmək qərarı çoxdan yetişmişdi. Qadağa ona gətirib çıxara bilər ki, sürücülər tədricən avtomobillərdən katalizatorları çıxarmağı dayandıracaqlar. Son illərdə ölkədə katalizatorların, o cümlədən istismara yararlı olanların sökülməsi təcrübəsi geniş yayılıb. Onların tərkibində kiçik həcmdə qiymətli metallar var, buna görə də toplama məntəqələrində katalizatorlara böyük tələbat mövcuddur.

Hazırda Ermənistanda istismar edilən avtomobillərin əhəmiyyətli bir hissəsi texniki qaydalara uyğun gəlmir və onların işlənmiş qazları atmosferi daha çox çirkləndirir. Ekologiya problemi ölkə əhalisinin az qala yarısının cəmləşdiyi və müvafiq olaraq ən çox avtomobilin olduğu İrəvanda xüsusilə aktualdır.

Hidrometeorologiya və Monitorinq Mərkəzinin məlumatına görə, İrəvanda azot və kükürd qazının miqdarı MPC normasından çoxdur. Bundan başqa, çirklənmənin 66,5 %-i avtomobil nəqliyyatının payına düşür.

Artyom Petrosyan diqqəti Avrasiya İqtisadi Birliyinin texniki reqlamentinin katalizatorsuz avtomobillərin istismarını qadağan etdiyinə yönəldib. Onun sözlərinə görə, müəyyən tələblər və standartlar var və katalizatoru olmayan avtomobil sadəcə texniki baxışdan keçməyəcək. Ermənistanda texniki baxış prosesi hələ də formal xarakter daşıyır, avtomobilin texniki vəziyyəti qiymətləndirilərkən reqlamentdə nəzərdə tutulan bütün məqamlar nəzərə alınmır, onlar əsasən əyləc sistemini, bəzən ehtiyat təkərin və ya qəza işarəsinin olmasını yoxlayırlar.