Qazaxıstan neftinin Azərbaycan üzərindən daşınma həcmi 4 milyon tona çatıb - EKSPERT

Azərbaycan üzərindən Qazaxıstan neftinin daşınması ilə bağlı layihə üzrə yeni göstəricilər açıqlanıb.

Avtosfer.az xəbər verir ki, nəqliyyat eksperti Rauf Ağamirzəyev sosial şəbəkə hesabında paylaşım edərək bildirib ki, SOCAR və “KazMunayQaz” (KMG) tərəfindən həyata keçirilən tranzit layihəsi uğurla davam etdirilir və daşınan ümumi həcm artıq 4 milyon tona çatıb.

Ekspertin sözlərinə görə, Qazaxıstan neftinin 427-ci partiyası “Prezident Heydər Əliyev” tankeri ilə martın 12-də Aktau limanından yola salınıb və martın 13-də Səngəçal terminalı ərazisinə çatdırılıb.

Qeyd olunub ki, bu günədək tranzit edilən neftin əsas hissəsi “Tengiz” yatağının payına düşür – ümumilikdə 3,8 milyon ton. Qalan 200 min ton isə “Kaşağan” yatağından hasil edilən neftdir. Bildirilib ki, “Tengiz” neftinin ilk partiyası 23 mart 2023-cü ildə, “Kaşağan” neftinin ilk partiyası isə 27 yanvar 2025-ci ildə Aktaudan Bakıya çatdırılıb.

Rauf Ağamirzəyev vurğulayıb ki, Aktau limanından Səngəçal terminalına gətirilən neft daha sonra Bakı-Tbilisi-Ceyhan boru kəməri vasitəsilə Türkiyənin Ceyhan limanına nəql olunur və oradan dünya bazarlarına çıxarılır.

Ekspert əlavə edib ki, layihədə Azərbaycan tərəfini SOCAR-ın törəmə qurumu olan “SOCAR Midstream Operations” MMC təmsil edir. Onun sözlərinə görə, bu marşrut regionun enerji və nəqliyyat xəritəsində Azərbaycanın strateji rolunu daha da gücləndirir və alternativ ixrac imkanlarının genişləndirilməsinə xidmət edir.

Eltac Zülfüqaroğlu