Türkiyədə bina ÇÖKDÜ - Dağıntılar altında QALANLAR VAR

İstanbulun Maltəpə rayonunda çökən binanın yeddimərtəbəli olduğu bəlli olub.

Avtosfer.az xəbər verir ki, bu barədə "Demirören" agentliyi məlumat yayıb.

Məlumata görə, tikilinin aşağıdan ilk 3 mərtəbəsi uçsa da, yuxarı mərtəbələrdə qalan sakinlər axtarış-xilasetmə qruplarının köməkliyi ilə təxliyə ediliblər.

Binanın zəmin mərtəbəsinin emalatxana kimi fəaliyyət göstərdiyi müəyyənləşib. Uçqun anında emalatxanada heç kimin olmadığı məlum olub. Dağıntılar altından 14 yaşlı bir nəfərin sağ olaraq xilas edildiyi və onun həyatı üçün heç bir təhlükənin olmadığı bildirilib.

Digər tərəfdən, binanın tamamilə çökmə ehtimalına qarşı ətrafda müvafiq təhlükəsizlik tədbirləri görülüb.

İstanbul Valiliyi də Maltəpədə qeydə alınan bina çöküntüsü ilə əlaqədar rəsmi məlumat yayıb.

"Səhər saatlarında Maltəpə rayonunda yeddimərtəbəli tikilinin üç mərtəbəsi uçub. Dərhal əraziyə AFAD əməkdaşları, yanğınsöndürənlər, eləcə də təcili tibbi yardım və hüquq-mühafizə orqanlarının əməkdaşları cəlb ediliblər", - deyə açıqlamada bildirilib.