18 illik təcrübəli mexanik ən etibarlı avtomobilləri açıqladı - SİYAHI

Avtomobil alarkən sürücülərin ən çox diqqət yetirdiyi əsas meyarlardan biri etibarlılıqdır. Az nasazlıq, servisə nadir müraciət və uzunmüddətli problemsiz istifadə avtomobil sahibləri üçün həm rahatlıq, həm də maddi üstünlük yaradır.

 Avtosfer.az xəbər verir ki, avtomobil servis sahəsində 18 illik təcrübəsi olan bir mexanik yollarda özünü ən etibarlı göstərən marka və modellərlə bağlı fikirlərini bölüşüb.

Təcrübəli mexanikin qiymətləndirməsinə əsasən, xüsusilə Asiya mənşəli avtomobil istehsalçıları etibarlılıq baxımından ön plana çıxır. Bildirilir ki, “Lexus”, “Kia” və “Hyundai” markalarına məxsus avtomobillər dövri texniki baxışlardan yüksək göstəricilərlə keçir və ciddi mexaniki nasazlıqlarla nadir hallarda üzləşir. Bu isə avtomobil sahiblərini gözlənilməz və bahalı təmir xərclərindən böyük ölçüdə qoruyur.

Mexanikin sözlərinə görə, son illər etibarlılıq baxımından xüsusi irəliləyiş nümayiş etdirən markalardan biri də “Kia”dır. “Picanto”, “Ceed” və “Niro” kimi modellər əksər hallarda ilk texniki baxışdan problemsiz keçir, ciddi mexaniki müdaxilə tələb edən halların faizi isə olduqca aşağıdır. Bu xüsusiyyətlər “Kia”nı həm fərdi sürücülər, həm də ailələr üçün cəlbedici seçimə çevirir.

Qeyd olunur ki, düzgün mühəndislik həlləri və keyfiyyətli dizayn etibarlılığın əsas şərtləridir. Mütəxəssisin fikrincə, “Lexus”, “Kia”, “Hyundai” və bəzi “Honda” modelləri bazar üzrə orta göstəricilərlə müqayisədə daha az əsaslı təmir tələb edir və təkrar yoxlamalara səbəb olan ciddi qüsurlar bu avtomobillərdə nadir hallarda qeydə alınır.

Bundan başqa, satışdan sonrakı xidmət mərhələsində də bu markaların üstünlükləri diqqət çəkir. Xüsusilə “Kia” və “Hyundai” avtomobillərinin ciddi nasazlıqlara görə servislərə geri qayıtma göstəricilərinin çox aşağı olduğu, bunun isə müştəri məmnuniyyətini artırdığı vurğulanır.

Avtomobil bazarı üzrə məlumatlara əsasən, “Kia”nın bir çox ölkədə təqdim etdiyi yeddi illik zəmanət paketi də etibarlılıq imicini gücləndirən əsas amillərdən biridir. Aparılan sorğular göstərir ki, bu markaların sahiblərinin böyük əksəriyyəti son illər ərzində ciddi texniki problemlərlə üzləşməyib və bahalı təmir xərclərindən yayınmağı bacarıb.

Araşdırmalar onu da göstərir ki, etibarlılıq təkcə rahat istifadə deyil, eyni zamanda xərclərin azalması deməkdir. Daha az nasazlıq daha aşağı servis xərcləri ilə nəticələnir. Son etibarlılıq reytinqlərində isə Yapon və Cənubi Koreya istehsalçıları ən yüksək mövqelərdə qərarlaşıb.

Eltac