“Apple CarPlay” və “Android Auto” niyə avtomobillərdən çıxarılır? – Səbəbi AÇIQLANDI

Avtomobil istehsalçıları 10 ildən artıqdır istifadə olunan “Apple CarPlay” və “Android Auto” sistemlərini tədricən avtomobillərdən çıxararaq öz proqram platformalarına keçməyə başlayıblar.

Avtosfer.az xəbər verir ki, şirkətlər hesab edir ki, avtomobilin mühüm funksiyalarının birbaşa istehsalçının yaratdığı proqram təminatı ilə inteqrasiyası daha məqsədəuyğundur.

Məsələn, “General Motors” şirkəti “Chevrolet Blazer EV” kimi yeni elektrikli modellərində “Apple CarPlay” və “Android Auto” dəstəyindən imtina edərək öz proqram platformasına keçib.

İstehsalçıların fikrincə, akkumulyatorun əvvəlcədən kondisionerləşdirilməsi, enerji doldurmanın idarə olunması və digər mühüm funksiyalar avtomobilin daxili proqram təminatı ilə birbaşa əlaqəli olmalıdır.

Bu yanaşmanın avtomobil istehsalçılarına həm proqram təminatı üzərində daha çox nəzarət, həm də avtomobilin müxtəlif funksiyalarını vahid sistemdə birləşdirmək imkanı verəcəyi bildirilir.

Bununla belə, “Apple CarPlay” və “Android Auto” kimi sistemlərdən istifadə edən sürücülər üçün bu dəyişiklik avtomobildə smartfon inteqrasiyasının əvvəlki formada mümkün olmayacağı anlamına gəlir.

Eltac Zülfüqaroğlu