Avtomobiliniz kiberhücuma məruz qala bilər – Bu əlamətlərə DİQQƏT

Müasir avtomobillərin texnoloji imkanları artdıqca kibertəhlükəsizlik məsələsi də daha çox əhəmiyyət qazanır. Artıq bəzi kiberhücumlar sürücünün hər hansı səhvindən asılı olmadan həyata keçirilə və avtomobilin elektron sistemləri üçün risk yarada bilər.

Avtosfer.az xəbər verir ki, avtomobilin multimedia ekranında görünən adi proqram yeniləməsi hər zaman düşünüldüyü qədər təhlükəsiz olmaya bilər. Xüsusilə internetə və müxtəlif onlayn xidmətlərə qoşulan avtomobillərdə proqram təminatına müdaxilə edilməsi potensial risklər yaradır.

Mütəxəssislər bildirirlər ki, müasir avtomobillər smartfon və kompüterlər kimi müxtəlif rəqəmsal sistemlərlə təchiz olunur. Naviqasiya, multimedia, mobil tətbiqlər, Bluetooth və internet bağlantısı kimi funksiyalar avtomobilin xarici sistemlərlə əlaqəsini artırır.

Bu isə kibercinayətkarların avtomobilin rəqəmsal sistemlərinə müdaxilə etməsi üçün potensial imkanlar yarada bilər. Hücum zamanı sürücünün hər hansı yanlış hərəkət etməsi mütləq deyil. Problem avtomobilin istifadə etdiyi proqram təminatındakı boşluq və ya etibarsız mənbədən yüklənmiş fayl vasitəsilə də yarana bilər.

Bəs avtomobilin kiberhücuma məruz qaldığını necə müəyyən etmək olar?

Mütəxəssislərin diqqət çəkdiyi mümkün əlamətlər arasında multimedia sisteminin səbəbsiz yerə yenidən başlaması, ekranın donması, tanınmayan tətbiq və ya bildirişlərin meydana çıxması, avtomobilin mobil tətbiqində qeyri-adi aktivlik, internet bağlantısında izaholunmaz problemlər və sistem funksiyalarının gözlənilməz şəkildə dəyişməsi yer alır.

Lakin bu əlamətlərin hər biri mütləq kiberhücum demək deyil. Bəzən texniki nasazlıq və ya proqram təminatındakı adi problem də eyni simptomlara səbəb ola bilər.

Bu səbəbdən sürücülərə avtomobilin proqram təminatını yalnız istehsalçının rəsmi mənbələrindən yeniləmək, tanımadığı tətbiqləri quraşdırmamaq və avtomobilə qoşulan hesabların təhlükəsizliyinə diqqət yetirmək tövsiyə olunur.

Avtomobillər getdikcə daha çox rəqəmsallaşdıqca təhlükəsizlik anlayışı da dəyişir. Artıq sürücünün yolda qaydalara əməl etməsi ilə yanaşı, avtomobilin elektron sistemlərinin kibertəhlükələrdən qorunması da vacib məsələlərdən birinə çevrilir.

Eltac Zülfüqaroğlu