Bəlkə bu ekspozisiya daimi olsun? - FOTOLAR

Hər il böyük bayramlarda (Novruz, Ramazan, Yeni il) Bakı metropoliteni retro qatarları nümayiş etdirir. Ekspozisiya yeri dəyişməzdir: İçərişəhər stansiyasının istifadədə olmayan yolu. 

Bəli, metropolitenin bu addımı təqdirəlayiqdir. Amma işin başqa tərəfi də var.
Retro qatarların nümayişi hər dəfə ciddi marağa səbəb olur. Şəxsən özüm qatarların hər ekspozisiyasına baş çəkmişəm və hər dəfə də artan marağın şahidi olmuşam. Elə sonuncu dəfə də bir hadisənin şahidi oldum: çox adam məhz qatarlara tamaşa etmək üçün metroya düşürdü. Bu da marağın göstəricisidir. Belə bir sual da ortaya çıxır: nə vaxtsa stansiyanın ikinci yolu daimi istismara verilsə retro qatarlar harada nümayiş etdiriləcək?

Belə bir ekspozisiyanın müvəqqəti deyil, daimi olması yerinə düşər.  Bunun üçün də Bakı metropoliteninin muzeyi olmalıdır. Belə bir muzey Bakı şəhərinin haqqıdır. İndi kiməsə qəribə gələ bilər. Lakin Bakıda metro istismara veriləndə Şərq xalqlarının başbilənləri hələ də yerin altı ilə getməyin haram olub-olmaması ilə bağlı mükalimələr yürüdür, fətva verirdilər. 

Buna görə də, belə bir ekspozisiya daimi olsa bir çox cəhətdən faydalı olar: əvvəla, belə bir muzeyin mövcudluğu yeni iş yerlərinin olması deməkdir. İkinci, belə bir muzeyin turistlərin də marağına səbəb olacağı şübhəsizdir. Nəhayət, belə bir müəssisənin mövcudluğu həm də metrpolitenə əlavə gəlir mənbəyi ola bilər.

Vüqar Yaşaroğlu