Bu avtomobildə mühərriki işə salma açarı sol tərəfdədir: Tarixi səbəb - FOTO

“Porsche” sükanına keçəndə diqqət çəkən ilk məqamlardan biri mühərriki işə salma açarının əksər avtomobillərdən fərqli olaraq sağda deyil, solda yerləşməsidir. Kiçik görünən bu detalın arxasında isə uzun illərin yarış tarixi, sürət və strategiya dayanır.

Avtosfer.az xəbər verir ki, bu xüsusiyyətin kökləri 1920-ci illərin ortalarına, məşhur “Le Mans” yarışına gedib çıxır. 1925-ci ildən etibarən bu yarışlar start zamanı fərqli formatda keçirilirdi. Avtomobillər tras boyu düzüldükdən sonra sürücülər maşınlarına çatmaq üçün qaçır, yerinə əyləşir, mühərriki işə salır və yarışa başlayırdılar. Ənənəvi sağ tərəfdə yerləşən alışdırma açarı ilə bu proses mərhələli şəkildə görülürdü.

“Porsche” mühəndisləri isə ağıllı həll tapdılar. Açarı sol tərəfə keçirdilər. Bu, sürücülərə sol əllə açarı döndərərək mühərriki işə salmağa, eyni anda sol ayaqla muftaya basmağa və sağ əllə ötürücüyü işə salmağa imkan verirdi. Beləliklə, bir neçə saniyə qazanılırdı ki, bu da uzun və çətin “Le Mans” yarışı üçün mühüm üstünlük idi.

Hərçənd yarış formatı artıq dəyişib və bu üsul praktik üstünlük yaratmır, “Porsche” həmin detalı qorumağa davam edir. Bu, artıq performansdan çox markanın kimliyini, ənənəyə sadiqliyini və dizayn fəlsəfəsini əks etdirən bir elementdir.

“Porsche” qurulduğu gündən idman avtomobillərinə fokuslanıb və avtoidmanda böyük uğurlara imza atıb. Brend 16 dəfə “Le Mans” qələbəsi qazanıb. Soldan alışdırma kimi kiçik görünən, amma mənalı bir detal isə hələ də “Porsche” ruhunun simvolu olaraq qalır.

Eltac Züflüqaroğlu