Bu avtomobildə yanacaq çəni ön oturacağın altındadır – SƏBƏB?

“Honda” bəzi kompakt modellərində yanacaq çənini ön oturacağın altına yerləşdirərək salonun daha geniş olmasına və döşəmənin hündürlüyünün azaldılmasına nail olub.

Avtosfer.az xəbər verir ki, şirkətin bu mühəndislik həlli arxa oturacaqda əyləşən sərnişinlər üçün ayaq və diz məsafəsinin artırılmasına imkan verir. Bu yanaşma “Honda”nın “Man-Maximum, Machine-Minimum” fəlsəfəsinə uyğun olaraq, kiçik ölçülü avtomobillərdə daha geniş və funksional salon yaratmaq məqsədi daşıyır.

Yanacaq çəninin ön hissəyə keçirilməsi arxa oturacaqların altında əlavə boşluq yaradıb. Bu isə “Honda”nın “Magic Seat” sistemini inkişaf etdirməsinə imkan verib. Sistemdə arxa oturacaqları həm qatlamaq, həm də yuxarı qaldırmaq mümkündür. Nəticədə iri əşyaların daşınması asanlaşır, baqaj hissəsində isə geniş və alçaq yükləmə sahəsi yaranır.

Bu dizayn yanaşmasından “Honda Jazz”, “Fit”, “Mobilio” və N seriyası modellərində istifadə olunur.

Maraqlı məqam ondan ibarətdir ki, avtomobilin yanacaq qapağının arxa hissədə yerləşməsi çənin də arxada olduğu anlamına gəlmir. Yanacaq doldurma xətti avtomobilin yan hissəsindən çənə qədər uzanır.

Eltac Zülfüqaroğlu