Bu düymə yanacaq sərfiyyatına təsir edə bilər – ARAŞDIRMA

Avtomatik sürətlər qutusu olan bir çox avtomobildə sürücülərin funksiyasını tam bilmədiyi “O/D” düyməsi mühüm işə yarayır. “Overdrive” sistemi sürətlər qutusunun ən yüksək pillədən istifadə edib-etməməsini müəyyənləşdirir.

Avtosfer.az xəbər verir ki, O/D sistemi aktiv olduqda avtomobil uyğun sürət və yük şəraitində ən yüksək ötürməyə keçir. Bu zaman mühərrik daha aşağı dövrlə işləyir ki, xüsusilə uzun yolda yanacaq sərfiyyatının və mühərrik səsinin azalmasına kömək edə bilər.

Sistem deaktiv edildikdə sürətlər qutusunun ən yüksək pilləyə keçməsi məhdudlaşdırılır və mühərrik eyni sürətdə daha yüksək dövrlə işləyir. Bu funksiya xüsusilə dik enişlərdə mühərrik əyləcindən daha çox istifadə etmək, həmçinin ağır yük və ya qoşqu ilə hərəkət zamanı sürətlər qutusunun tez-tez pillə dəyişməsinin qarşısını almaq üçün tətbiq oluna bilər.

Paneldə “O/D OFF” işığının yanması isə funksiyanın söndürüldüyünü göstərir. Düyməyə yenidən basmaqla sistem aktivləşdirilə bilər.

Qeyd olunur ki, yeni nəsil avtomobillərdə ayrıca O/D düyməsinə daha az rast gəlinir. Müasir avtomobillərdə sürətlər qutusu uyğun pilləni sürət, mühərrik yükü, qaz pedalı və digər göstəricilərə əsasən elektron şəkildə özü seçir.

Eltac Zülfüqaroğlu