Bu ölkədə piyada sürəti ilə bağlı zolaqlar təşkil olunur - FOTO

Cənubi Koreyada piyada hərəkətini daha nizamlı və rahat etmək məqsədilə yeni bir sistem tətbiq edilir.

Avtosfer.az xəbər verir ki, məlumatı “İnsanoid” səhifəsi paylaşıb.

Yeniliyə əsasən, səkilər funksional baxımdan iki hissəyə bölünür. Bir tərəf daha sürətli hərəkət edən piyadalar üçün nəzərdə tutulur, digər tərəfdə isə yaşlılar, uşaqlı ailələr, turistlər və ümumilikdə daha yavaş tempdə hərəkət edən şəxslər üçün xüsusi zona yaradılır. Bu bölgü vasitəsilə piyadaların bir-birinə mane olmadan hərəkət etməsi hədəflənir.

Hazırda sistem əsasən vağzallarda və insan sıxlığının yüksək olduğu küçə və ictimai məkanlarda sınaq mərhələsində tətbiq edilir. Yerli qurumlar layihənin nəticələrini müşahidə edərək onun daha geniş ərazilərdə tətbiqi barədə qərar verməyi planlaşdırır.

Layihənin əsas məqsədi sıxlıq olan ərazilərdə piyadaların hərəkəti zamanı yaranan toqquşma və gözləmələri minimuma endirmək, gediş-gəlişi daha axıcı və nizamlı təşkil etmək, eyni zamanda bütün kateqoriyadan olan piyadalar üçün daha rahat və təhlükəsiz hərəkət mühiti yaratmaqdır.

Mütəxəssislərin fikrincə, bu cür bölgü xüsusilə metro stansiyaları, ticarət mərkəzləri və şəhər mərkəzlərində piyadaların hərəkət səmərəliliyini əhəmiyyətli dərəcədə artıra bilər.

Eltac Zülfüqaroğlu