Elektrikli avtomobillərdə mufta və sürət qolu dövrü yenidən gündəmə gəlir?

Yaponiyanın avtomobil nəhəngi “Toyota” elektrikli nəqliyyat vasitələrində mufta və sürət qolu təcrübəsini təqdim edəcək, hətta yanlış istifadə zamanı mühərrikin sönməsini simulyasiya edəcək yeni sistem üçün patent müraciəti edib.

Avtosfer.az xəbər verir ki, “Toyota” elektrikli avtomobil texnologiyasında sürücülük vərdişlərini dəyişdirə biləcək yeni addım atıb. Şirkət daxili yanma mühərrikli avtomobillərdəki sürət dəyişdirmə mexanikasını və hissini elektrikli nəqliyyat vasitələrinə inteqrasiya etməyi nəzərdə tutan simulyasiya edilmiş mexaniki ötürmə sistemi hazırladığını açıqlayıb.

Yeni texnologiya sürücünün birbaşa istifadə edə biləcəyi fiziki mufta pedalı və sürət qolu ilə təchiz olunacaq. Elektrikli avtomobillərin xətti sürətlənmə xüsusiyyətindən fərqli olaraq, sistem sürücüyə ənənəvi mexaniki sürət qutulu avtomobili idarə etmə hissi verməyi hədəfləyir.

Bu texnologiya yalnız sürət dəyişmələrini simulyasiya etməklə kifayətlənmir, eyni zamanda daxili yanma mühərrikli avtomobillərdə baş verən bəzi sürücü səhvlərini də təkrarlaya bilir. Belə ki, sürücü uyğun olmayan mühərrik dövriyyəsində səhv ötürmə seçərsə, sistem mühərrikin sönməsini imitasiya edərək daha real sürücülük təcrübəsi yaradır.

Eltac Zülfüqaroğlu