Gömrük proseslərinin sadələşdirilməsi logistik xərcləri azalda bilər - İQTİSADÇI

Azərbaycan, Gürcüstan və Türkiyə arasında gömrük prosedurlarının sadələşdirilməsi və sərhəd-keçid proseslərinin sürətləndirilməsi yükdaşımaların daha səmərəli təşkili baxımından mühüm əhəmiyyət daşıyır.

Avtosfer.az xəbər verir ki, üç ölkə arasında gömrük proseslərinin sürətləndirilməsi Azərbaycanın tranzit imkanlarının genişlənməsi və xarici ticarət əlaqələrinin inkişafı baxımından da müzakirə olunur. Bəs bu dəyişikliklər sahibkarlar və yükdaşıyıcılar üçün hansı üstünlükləri yarada bilər və Azərbaycanın tranzit potensialına necə təsir göstərə bilər?

Mövzu ilə bağlı iqtisadçı Xalid Kərimli Avtosfer.az-a açıqlamasında bildirib ki, gömrük sərhəd-keçid məntəqələri arasında informasiya mübadiləsinin aparılması sahibkarlar və yükdaşıyıcılar üçün sərhədi daha sürətli keçməyə imkan verəcək:

''Bir gömrük sərhədindən keçən yük barədə məlumatların digər gömrük sərhədinə ötürülməsi yüklərin növbəti məntəqədə uzun müddət gözləməsinin qarşısını ala bilər. Bu isə həm sahibkarların mallarının daha sürətli çatdırılmasına, həm də yükdaşıyıcıların daşıma xərclərinin azalmasına şərait yaradacaq. Yük maşınının yolda hər gün dayanması əlavə xərc yaradır. Əgər yükdaşıma müddəti 10 gündən 9 günə endirilirsə, avtomatik olaraq yükdaşıyan nəqliyyat vasitələrinin xidmət imkanları da artır. Beləliklə, həm xərclər azalır, həm də malların yolda qalma müddəti qısalır. Tranzit yüklərin daha sürətli daşınması ölkələrin tranzit imkanlarını artırmaq baxımından da əhəmiyyətlidir. Onun fikrincə, xüsusilə Mərkəzi Asiyadan gələn yüklərin daha sürətli hərəkətinin təmin edilməsi Orta Dəhlizin imkanlarından səmərəli istifadə baxımından vacibdir''.

Fatimə