Hindistan yeni nüvə sualtı qayıq bazası açacaq

Hindistan Hərbi Dəniz Qüvvələri 2026-cı ildə Andhra-Pradeşdə yeni bazanı istismara verməyi planlaşdırır.

Avtosfer.az-ın xəbərinə görə, bu barədə "The Times of India" mənbəyə istinadən məlumat verib.

Hərbi Dəniz Qüvvələrinin Şərq komandanlığının Vişakhapatnamdakı qərargahından 50 km cənubda tikilən baza nüvə sualtı qayıqlarının yerləşdirilməsi üçün tunellər şəbəkəsinə malikdir. Bu, onlara casus peyklər tərəfindən aşkarlanma təhlükəsi olmadan Benqal körfəzinə daxil olmağa imkan verəcək.

"Varşa layihəsi üzrə Rambilli bazasının birinci mərhələsi demək olar ki, başa çatıb. 2026-cı ildə istismara verildikdən sonra onu mərhələli şəkildə genişləndirmək və təkmilləşdirmək olacaq", - deyə mənbə nəşrə bildirib.

"The Times of India"nın qeyd etdiyi kimi, Hindistan, həmçinin qərb sahilindəki Karnataka ştatında yerləşən Karvar bazasını da tədricən təkmilləşdirir. Layihənin hazırkı mərhələsinin reallaşdırılması orada 32 iri gəminin yerləşdirilməsinə imkan verəcək.

"Daxili liman hazırdır. Xarici hissədə işlər davam edir", - deyə mənbə əlavə edib.

Gələcəkdə obyektin 50 gəmi və sualtı qayıq, 40 yardımçı gəminin yerləşdirilməsi üçün genişləndirilməsi planlaşdırılır.(oxu.az)