İctimai nəqliyyat və avtobus zolaqları şəhər nəqliyyatı üçün niyə önəmlidir? – TƏHLİL - FOTO

Şəhər nəqliyyatının səmərəli təşkili üçün ictimai nəqliyyata üstünlük verilməsi əsas şərtlərdən biri hesab olunur. 

Avtosfer.az xəbər verir ki, avtobus zolaqlarının yaradılması tıxacların artmasına deyil, əksinə, küçələrin buraxılış qabiliyyətinin yüksəlməsinə xidmət edir.

Müqayisəli fotolar aydın şəkildə göstərir ki, bir avtobusda daşınan sərnişinlərin tutduğu yol sahəsi, eyni sayda insanın minik avtomobillərində hərəkəti ilə müqayisədə xeyli azdır. Sadə dildə desək, küçə sahəsindən daha səmərəli istifadə edən nəqliyyat növü ümumi hərəkət axınını daha effektiv təmin edə bilir.

Bu baxımdan avtobus zolaqlarının salınması küçədə hərəkətin təşkilini optimallaşdırır, ictimai nəqliyyatın sürətini və dəqiqliyini artırır. Nəticədə minlərlə sərnişin daha qısa vaxtda mənzil başına çatır, tıxacların ümumi təsiri isə azalır.

Ekspertlər vurğulayırlar ki, avtobus zolaqları şəxsi avtomobil sürücülərinə qarşı yönəlmiş addım deyil. Bu qərarların əsasında emosiyalar yox, riyazi hesablamalar, həndəsi ölçülər və şəhər nəqliyyatının real imkanları dayanır. İctimai nəqliyyata verilən prioritet ümumilikdə şəhər mobilliyini artırır və küçələri hamı üçün daha səmərəli edir.

Eltac Zülfüqaroğlu