Rusiyada "BMW"nin xəbəri olmadan "BMW" istehsal edirlər

Rusiyada "BMW" markasının rəsmi fəaliyyətini dayandırmasına baxmayaraq, Kalininqrad şəhərində yerləşən "Avtotor" zavodunda alman istehsalçısının xəbəri olmadan avtomobillərin yığılaraq satışa çıxarıldığı iddia olunur.

Avtosfer.az xəbər verir ki, söhbət "BMW X3", "BMW X5" və "BMW X6" modellərindən gedir. Məlumata görə, bu avtomobillər 2022-ci ildə şirkətin Rusiya bazarını tərk etməsindən əvvəl anbarda qalan orijinal ehtiyat hissələrindən yığılıb.

İddialara əsasən, avtomobillərin bir hissəsi hətta 2026-cı il istehsalı kimi təqdim olunaraq satışa çıxarılıb. Halbuki onların hazırlanmasında illər əvvəl istehsal edilmiş komponentlərdən istifadə edilib. Bu səbəbdən avtomobillər qeyri-rəsmi şəkildə "pirat BMW" adlandırılır.

Bildirilir ki, həmin avtomobillər rəsmi "BMW" istehsalı hesab edilmir və şirkət onların istehsalı, keyfiyyətinə nəzarət və ya zəmanət öhdəlikləri ilə bağlı heç bir məsuliyyət daşımır. Məhz buna görə də alıcıların bir hissəsi bu avtomobillərə ehtiyatla yanaşır.

Buna baxmayaraq, "pirat BMW"lər paralel idxal yolu ilə Rusiyaya gətirilən orijinal "BMW" modelləri ilə müqayisədə daha aşağı qiymətə təklif olunur. Lakin premium avtomobil almaq istəyən və imkanlı alıcıların əksəriyyətinin paralel idxal vasitəsilə ölkəyə gətirilən rəsmi "BMW" modellərinə üstünlük verdiyi bildirilir.

Qeyd edək ki, "BMW" 2022-ci ildə Rusiyada avtomobil istehsalını və rəsmi satış fəaliyyətini dayandırmışdı. Bundan sonra ölkədə bir sıra xarici avtomobil markalarının istehsal sahələrinin fərqli formada fəaliyyətini davam etdirməsi ilə bağlı oxşar hallar da gündəmə gəlib.

Eltac Zülfüqaroğlu