Sürət qutusunda problem olduğunu göstərən 5 vacib əlamət – ARAŞDIRMA

Avtomatik transmissiyalı avtomobillərdə yaranan mexaniki və elektron nasazlıqlar vaxtında aşkar edilmədikdə sürücülər üçün yüksək təmir xərclərinə səbəb ola bilər.

Avtosfer.az xəbər verir ki, transmissiya sistemindəki problemlər əksər hallarda qəfil baş vermir, əvvəlcədən müxtəlif əlamətlərlə özünü büruzə verir.

Onların sözlərinə görə, bu xəbərdarlıq siqnallarına vaxtında diqqət yetirilməsi avtomobilin ən mürəkkəb və bahalı aqreqatlarından biri olan sürət qutusunun ciddi zədələnməsinin qarşısını ala bilər.

Transmissiyada yaranan ilk problemlərdən biri ötürücü dəyişdirilərkən hiss olunan təkanlar, döyülmələr və ya sərt keçidlərdir. Belə hallar transmissiya yağının səviyyəsinin və ya keyfiyyətinin aşağı düşməsindən, həmçinin klapan mexanizmində, mufta sistemində və ya elektron idarəetmə blokunda yaranan nasazlıqlardan qaynaqlana bilər.

Digər mühüm əlamət isə avtomobil "D" (Drive) və ya "R" (Reverse) rejiminə keçirildikdən sonra hərəkətin gec başlamasıdır. Əgər avtomobil seçilmiş rejimə salındıqdan bir neçə saniyə sonra hərəkət edirsə, bu, transmissiya sistemində hidravlik təzyiq itkisinə işarə edə bilər. Xüsusilə soyuq mühərriklə işə salınma zamanı bu halın tez-tez təkrarlanması sürət qutusunda aşınmanın olduğunu göstərə bilər.

Mütəxəssislər qeyd edirlər ki, qaz pedalına basıldıqda mühərrikin dövriyyəsi artsa da, avtomobilin sürətlənməməsi də ciddi xəbərdarlıq siqnalıdır. Sürücülərin "mühərrik işləyir, amma avtomobil getmir" kimi təsvir etdikləri bu vəziyyət adətən transmissiyada sürüşmə problemini göstərir və mufta elementlərinin aşındığını göstərən əsas əlamətlərdən biri hesab olunur.

Bundan başqa, sürət dəyişdirilərkən və ya hərəkət zamanı transmissiya hissəsindən gələn vızıltı, fit və ya metal səsləri də diqqətdən kənarda qalmamalıdır. İlk vaxtlar zəif eşidilən bu səslər zaman keçdikcə güclənə və transmissiya mexanizminin ciddi zədələnməsinə səbəb ola bilər.

Transmissiya yağının sızması da təhlükəli nasazlıqlardan biri hesab olunur. Avtomobil saxlanılan yerdə qırmızı, qəhvəyi və ya tünd rəngli maye ləkələrinin görünməsi sürət qutusundan yağ sızdığını göstərə bilər. Belə hallarda yağın səviyyəsi və təzyiqi aşağı düşür, nəticədə transmissiya həddindən artıq qızır və sistemin sıradan çıxması riski artır.

Mütəxəssislər sürücülərə bu cür əlamətləri görməzlikdən gəlməməyi tövsiyə edirlər. Onların sözlərinə görə, erkən diaqnostika və vaxtında texniki müdaxilə həm bahalı təmir xərclərinin qarşısını alır, həm də avtomobilin etibarlı və təhlükəsiz istismarını təmin edir.

Eltac Zülfüqaroğlu