Yay yaxınlaşır, aviaşirkətlərin narahatlığı artır

Yaxın Şərqdə davam edən böhran aviasiya sektoruna da ciddi ziyan vurur. Bu ziyan regiona uçuşların minimuma enməsi, yolun uzanması, yaxud aeroportların hədəfə alınması ilə məhdudlaşmır. Son günlərdə aviasiya yanacağının qiymətində kəskin bahalaşma müşahidə olunur. Bu da bir tərəfdən uçuşlarln rentabelliliyini azaldır, digər tərəfdən qiymət artımı ilə nəticələnir. Yay mövsümünün yaxınlaşması ilə vəziyyət daha ciddi hal alır. 

Avtosfer.az xəbər verir ki, aviasiya sektoru nadir rast gəlinən vəziyyətlə üzləşib. Yaxın Şərqdə davam edən gərginlik dənizçiliklə yanaşı, aviasiya sektoruna da ciddi ziyan vurub. Yaxın Şərq ölkələrinə uçuşlar tarixi minimuma enib. Bu regiondan yan keçmək isə aviaşirkətlərin xərclərini artırıb. 

Lakin aviadaşıyıcıları narahat edən başlıca məsələ yanacağın bahalaşmasıdır. Son 1 ayda xam neftin qiyməti 60 faizədək qalxıb. Bu da kerosinin qiymətinin artması ilə nəticələnir. Londonda 1 ton aviasiya yanacağı 1900 dollara təklif edilir.

Doğrudur, 1946-cı il Çikaqo konvensiyası kersinə vergi tətbiqini qadağan edir. Lakin, logistika və digər xərclərə görə maya dəyərinin artması qanunla tənzimlənmir. Avropada Yaxın Şərqdən idxal edilən aviasiya yanacağı 50 faizdən çox bahalaşıb.

Təbii ki, bu bahalaşma bilet qiymətlərinə də təsirsiz ötüşmür. Martın 26-dan sonra Avropadan digər regionlara reyslərin qiyməti 100 avro, daxili reyslər isə 10-15 avro bahalaşıb. ABŞ-dən olan aviasiya eksperti Kollin Valke deyir: “Yaxın Şərqdə münaqişə başlayandan sonra şirkətlərin istismar xərclərində yanacağın payı 25 faizdən 45 faizə qalxıb. Bu bahalaşma uçuşların rentabelliliyini azaldır. Şirkətlər bəzi reysləri ləğv etməyə məcbur qalır. Vəziyyət belə davam edərsə, aeroportlar təkcə bahalıq deyil, həm də yanacaq qıtlığı ilə üzləşəcək”.

Qaydaya görə, artıq satılmış biletlərin qiyməti dəyişdirilə bilməz. Yay mövsümü yaxınlaşır ki, bu da uçuşların intensivliyinin artması ilə nəticələnir. Şirkətləri isə bir məsələ düşündürür: Yaxın Şərq münaqişəsi uzanacağı təqdirdə yanacaq qıtlığı qaçınılmaz olacaq. Bu da reyslərin ləğvi və ya gecikməsini labüd edəcək.

Vüqar