Yeniyetmədən təhlükəli “şou”: Əks yola çıxıb velosipedin təkərini göyə qaldırdı - VİDEO

Paytaxtın Qara Qarayev prospektində velosiped sürən yeniyetmənin təhlükəli hərəkətləri kameraya düşüb.

Avtosfer.az-ın məlumatına görə, hadisə bir müddət əvvəl səhər saatlarında qeydə alınıb. Kadrlardan görünür ki, yeniyetmə velosipedlə əks istiqamətli yola çıxaraq hərəkət edib. Bununla kifayətlənməyən oğlan velosipedin ön təkərini havaya qaldıraraq yol boyu “şou” göstərib.

Nəticədə o həm özünə, həm də digər hərəkət iştirakçılarına təhlükə yaradıb. Xüsusilə nəqliyyat vasitələrinin intensiv hərəkət etdiyi yolda velosipedi idarəetməni çətinləşdirən bu cür hərəkətlər qəza riskinə gətirib çıxarır.

Xatırladaq ki, qanunvericiliyə əsasən, 14 yaşına çatmayan şəxslərin velosipedlə yolun hərəkət hissəsinə çıxmasına yol verilmir. Belə hallarda uşağın yola nəzarətsiz buraxılmaması və təhlükəli davranışların qarşısının alınması valideynlərin üzərinə düşən əsas məsuliyyətlərdəndir.

Nərmin