Azərbaycanda piyadavurma hadisələri niyə azalmır? – Mütəxəssis AÇIQLADI - VİDEO

Piyadavurma hadisələrinin azalmasın mane olan əsas amillərdən biri piyadaların yol hərəkətinə məsuliyyətsiz yanaşmasıdır.

Avtosfer.az xəbər verir ki, bu barədə qəza əleyhinə kursların məşqçisi Aqil Rəhimov danışıb. Onun sözlərinə görə, son dövrlər piyadaların davranışında təhlükəli “yeni mərhələ” müşahidə olunur:

“Bizə tez-tez sual verirlər ki, piyadavurma hadisələri niyə azalmır? Çünki piyadalar artıq yolun ortasında belə təhlükəni unudurlar. Elə hallar var ki, insanlar yolun hərəkət hissəsində dayanaraq selfi çəkir, ətrafda hərəkət edən avtomobilləri isə nəzərə almırlar”.

Elektromobilini şarj etdirmək üçün 2 saatdan çox gözləməli oldu - VİDEO
Mütəxəssis qeyd edib ki, yayılan görüntülərdə yolun ortasında özünü çəkən bir gəncin davranışı açıq şəkildə həyat üçün ciddi risk yaradır. Onun sözlərinə görə, bu cür məsuliyyətsizlik təkcə sürücülər üçün deyil, piyadaların özləri üçün də ağır nəticələrə səbəb ola bilər.

Aqil Rəhimov vurğulayıb ki, yol hərəkəti təhlükəsizliyi yalnız sürücülərin deyil, piyadaların da birbaşa məsuliyyətidir və hər kəs öz həyatını qorumağı birinci yerə qoymalıdır:

“Yol zarafat yeri deyil. Piyadalar da unutmamalıdır ki, bir anlıq diqqətsizlik həyatlarına son qoya bilər”.

Mütəxəssislər piyadalara yolun hərəkət hissəsində telefonla məşğul olmamağı, yalnız müəyyən olunmuş keçidlərdən istifadə etməyi və yol hərəkəti qaydalarına ciddi əməl etməyi tövsiyə edirlər.

Eltac Zülfüqaroğlu