Qarlı ərazidə batan maşını necə çıxartmaq olar? – Sürücülərə TÖVSİYƏ

Qarlı və palçıqlı hava şəraitində avtomatik ötürücülü avtomobillərin ilişib qalması sürücülər üçün tanış problemdir. Lakin mütəxəssislər xəbərdarlıq edirlər ki, belə hallarda qaz pedalını sona qədər basmaq çıxış yolu deyil, əksinə, ötürücü sistem üçün ciddi və baha başa gələn nasazlıqlara səbəb ola bilər.

Avtosfer.az xəbər verir ki, avtomobil palçıqda və ya qarda ilişdikdə sürücülərin instinktiv olaraq qazı artırması təkərlərin sürüşməsini daha da gücləndirir. Fizika qanunlarına görə, yüksək sürətlə fırlanan təkərlər altındakı qarı əridir, yaranan su isə dərhal buz qatına çevrilir. Nəticədə avtomobil daha sürüşkən və dərin bir çuxura “oturur”.

Ən böyük risk isə avtomatik transmissiyalarda yaranır. Mexaniki ötürücüdə muftanın yanma qoxusu sürücüyə xəbərdarlıq etsə də avtomatik ötürücülər səssiz şəkildə sıradan çıxır. İlişib qalmış avtomobildə bir təkərin boş fırlanması diferensial daxilindəki dişlilərə və yağ sisteminə həddindən artıq yük salır. Bu isə diferensialın, ötürücü valların və hətta transmissiya korpusunun sıradan çıxması ilə nəticələnə bilər.

Xüsusilə CVT tipli ötürücülər belə hallara daha həssas hesab olunur. Təkərin qəfil bərk səthlə təması zamanı yaranan zərbə kəmərin və ya dişlilərin zədələnməsinə səbəb olur. Klassik avtomatik ötürücülərdə isə fırlanma anı çeviricisində yağın həddindən artıq qızması sürtünmə lövhələrinin yanmasına və sonradan ötürmədə sarsıntıların yaranmasına gətirib çıxarır.

Mütəxəssislər bildirirlər ki, qarda və ya palçıqda ilişib qaldıqda ən doğru addım sakit qalmaq və avtomobili “yelləmə” üsulu ilə çıxarmağa çalışmaqdır. Ötürücü rejimləri yalnız avtomobil tam dayandıqdan sonra dəyişmək, qazı az vermək, ehtiyac olduqda ESP sistemindən düzgün istifadə etmək tövsiyə olunur. Təkərlərin altına rezin ayaqaltı, qum və ya dartmanı artıran materialların qoyulması da kömək edə bilər.

Qısa desək, qarlı havada bir anlıq panika və artıq qaz, sürücüyə sonradan minlərlə manatlıq təmir xərci kimi qayıda bilər. Avtomatik ötürücülü avtomobillərdə səbr və düzgün texnika ən ucuz və təhlükəsiz çıxış yoludur.

Eltac Zülfüqaroğlu