Sürücülər bu səhvləri təkrarlayaraq maşının mühərrikinə ziyan vurur - ARAŞDIRMA

Bir çox sürücülər gündəlik istifadə zamanı buraxdıqları sadə səhvlərin mühərrikə ciddi ziyan vura biləcəyindən xəbərsizdirlər.

Avtosfer.az xəbər verir ki, mütəxəssislərin fikrincə, müntəzəm texniki xidmətə etinasızlıq və düzgün olmayan vərdişlər mühərrikin ömrünü qısaldan əsas amillərdəndir. Təmirlərin qarşısını almaq və avtomobilin xidmət müddətini uzatmaq üçün bu səhvlərdən xüsusilə qaçınılmalıdır.

Mütəxəssislər bildirirlər ki, mühərrikdə nasazlığa səbəb olan yayğın problemlərdən biri drossel klapanının düzgün və ya həddindən artıq təmizlənməsidir. Düzgün aparılmayan təmizləmə prosesi hava axınını poza və mühərrikin nizamsız işləməsinə gətirib çıxara bilər. Bu səbəbdən, prosedur yalnız zəruri olduqda və düzgün texnika ilə həyata keçirilməlidir.

Digər ciddi səhv isə istehsalçının tövsiyəsinə uyğun olmayan alışdırma şamlarından (sveça) istifadədir. Yanlış şamların quraşdırılması mühərrikin qeyri-sabit işləməsinə, performans itkisinə, alovlanma nasazlıqlarına və yanacaq sərfiyyatının artmasına səbəb olur.

Hava filtrinin vaxtında dəyişdirilməməsi də mühərrik üçün təhlükəli nəticələr yaradır. Filtr mühərrikə daxil olan havanı zərərli hissəciklərdən təmizləmək üçün vacibdir. Onun köhnəlməsi və ya uyğun olmayan filtrdən istifadə toz və kirin mühərrikə daxil olmasına, nəticədə ciddi və bahalı zədələnmələrə gətirib çıxara bilər.

Mühərrik yağının dəyişdirilməsi zamanı istehsalçının müəyyən etdiyi özlülük dərəcəsinə və texniki xüsusiyyətlərə əməl edilməməsi yağlamanın keyfiyyətini aşağı salır. Bu isə mühərrik hissələrinin daha sürətli aşınmasına, performansın zəifləməsinə və gələcəkdə bahalı təmir işlərinə səbəb olur.

Bundan başqa, aşağı keyfiyyətli yanacaqdan istifadə də ciddi problemlər yaradır. Keyfiyyətsiz yanacaq yanma kamerasında çöküntülərin yığılmasına, enjektorların çirklənməsinə və mühərrikin ümumi işləmə ritminin pozulmasına gətirib çıxarır. Buna görə də standartlara cavab verən yanacağın istifadəsi mühərrikin sağlam və stabil işləməsi üçün xüsusilə vacibdir.

Eltac Zülfüqaroğlu