Tələbələr “gəlin maşını”nın qarşısını PUA ilə kəsdi - VİDEO

Türkiyənin Sakarya şəhərində 25 nəfərlik universitet tələbəsindən ibarət bir komanda TEKNOFEST texnologiya festivalı üçün hazırladıqları pilotsuz uçuş aparatı (PUA) ilə qeyri-adi bir nümayiş həyata keçiriblər.

Avtosfer.az xəbər verir ki, tələbələrin hazırladığı PUA, yoldan keçən gəlin avtomobilinin qarşısını kəsərək sürücünü dayanmağa məcbur edib. Gəlin maşını havada asılı qalan PUA-nın yaratdığı sürprizlə qarşılaşdıqda, ətrafdakılar bu mənzərəni maraqla izləyib.

Sosial şəbəkələrdə yayılan görüntülər qısa zamanda böyük marağa səbəb olub, izləyicilər həm tələbələrin texnologiyaya olan marağını, həm də bu hadisənin orijinal təqdimatını təqdir ediblər. Toy kortejinin qarşısını kəsmək adəti bir çox bölgədə yaşadılan ənənəvi zarafat olsa da bu dəfə onu yerdən deyil, göydən edilməsi sosial şəbəkə istifadəçilərini həm təəccübləndirib, həm də əyləndirib.

Hadisə ilə bağlı Sakarya Universitetinin tələbələri bildirib ki, məqsədləri həm hazırladıqları texnoloji layihəni nümayiş etdirmək, həm də bu anı unudulmaz etmək olub. Hazırlanan pilotsuz aparatın avtomatik uçuş sistemi və vizual sensorlarla təchiz olunduğu qeyd olunub.

Eltac Zülfüqaroğlu