Tüninq olunan hansı sükanlardan istifadəyə icazə var? – AÇIQLAMA - FOTO

Son zamanlar bəzi sürücülər avtomobiln sükanını fərqli görünüşə və ya idman üslubuna yaxınlaşdırmaq məqsədilə kəsik (altı düz) sükanla əvəz edirlər. Bu cür dəyişiklik vizual olaraq cəlbedici görünsə də, onun təhlükəsizlik, qanunvericilik və texniki baxımından doğura biləcəyi nəticələr müzakirə mövzusudur.

Avtomobilin sükanında dəyişiklik edərək onu kəsik sükanla əvəzləmək qanunidirmi? Bu halda nəqliyyat vasitəsini texniki baxışdan keçirmək mümkündürmü və belə bir dəyişiklik təhlükəsizlik baxımından risklidirmi?

Mövzu ilə bağlı radio aparıcısı Elgün Xıdırov Avtosfer.az-a açıqlamasında bildirib ki, maşında sükan çarxının əvəzlənməsi mümkündür:

“Amma sükan çarxına aid xüsusi tələblər olmasa da, onun ən azından sertifikasiyadan keçmiş şirkət tərəfindən istehsal olunması lazımdır. Əsas tələblər təhlükəsizliklə bağlıdır.

Burada dönmə bucağına baxmaq lazımdır ki, minik avtomobilinin, yəni ümumi yollarda istifadə olunan avtomobilin sükan çarxının dönməsi ən azı 2 dövrə yarım - 900 dərəcə və daha artıq dönmədir. Formula bolidlərində bu, 1 dövrədir. Yəni, 2 dövrə yarıma qarşı 1 dövrə qoyuruq.

Onların sükan çarxını gətirib minik avtomobilinin sükan çarxına qoymaq olmaz. Orada tamam başqa standartlar, başqa dönmə bucaqlarıdır. O baxımdan, sükan çarxının üstünü, altını kəsib təyyarə çarxı edim düşüncəsi həmin detalı yararsız hala salmaq deməkdir”.

Eltac Zülfüqaroğlu