Yol kənarında dayanan piyadalar niyə sürücülər üçün risk yaradır? – VİDEO

Yolun kənarında dayanan piyadalar sürücülər üçün potensial risk yaradır. Belə hallarda sürücünün diqqətli davranması və mümkün təhlükəni əvvəlcədən qiymətləndirməsi vacibdir.

Avtosfer.az xəbər verir ki, qəza əleyhinə kursların məşqçisi Aqil Rəhimovun sözlərinə görə, yolun kənarında dayanan piyadanı hər an hərəkətə başlaya biləcək şəxs kimi qəbul etmək lazımdır.

O bildirib ki, sürücü belə vəziyyətlərdə diqqətini artırmalı, ayağını qaz pedalından çəkərək əyləcə hazır vəziyyətdə saxlamalıdır:

“Yolun kənarında dayanan piyada istənilən an yolu keçməyə cəhd göstərə bilər. Buna görə də sürücü həmin şəxsə yaxınlaşarkən vəziyyəti əvvəlcədən analiz etməli, sürəti yol şəraitinə uyğun azaltmalı və ayağını əyləc pedalına yaxın saxlamalıdır. Piyadanın yanından keçərkən əyləcə hazır olmaq vacibdir. Çünki bəzi hallarda piyadalar son anda hərəkət etməyə başlayırlar. Belə vəziyyətlərdə sürücünün reaksiyası nə qədər tez olarsa, qəzanın qarşısını almaq ehtimalı da bir o qədər yüksək olar”.

Yaşayış məntəqələrində, məktəb və dayanacaq yaxınlığında, həmçinin insanların sıx hərəkət etdiyi ərazilərdə ehtiyatlılıq daha da artırılmalıdır.

Mütəxəssis qeyd edib ki, sürücülər piyadaların davranışını dəqiq proqnozlaşdıra bilmədikləri üçün hər zaman ən riskli variantı nəzərə almalı, təhlükəsiz məsafə və sürət rejiminə əməl etməlidirlər.

Sürücünün bir neçə saniyəlik diqqəti və qabaqlayıcı davranışı həm insan həyatını qoruya, həm də ağır yol-nəqliyyat hadisələrinin qarşısını ala bilər. Bu baxımdan, yolun kənarında gözləyən piyadaya yaxınlaşarkən maksimum diqqətli olmaq və əyləcə hazır vəziyyətdə qalmaq tövsiyə edilir.

Eltac Zülfüqaroğlu