Yola paralel parklanan maşınlardan azı 1 metr uzaq keçmək lazımdır – SÜRÜCÜLƏRƏ TÖVSİYƏ - VİDEO

Yol kənarında park edilmiş avtomobillər sürücülər üçün gözlənilməz təhlükə yarada bilər. 

Avtosfer.az xəbər verir ki, qəza əleyhinə kursların məşqçisi Aqil Rəhimov bu barədə sürücülərə mühüm tövsiyələr verib.

Onun sözlərinə görə, sürücülər yolun sağında və ya solunda dayanan avtomobillərin yanından keçərkən ən azı 1–1,5 metr məsafə saxlamalıdırlar. Çünki bəzi hallarda avtomobil sahibləri qapıları qəfil və geniş şəkildə aça bilər ki, bu da hərəkətdə olan nəqliyyat vasitələri üçün ciddi təhlükə yaradır.

Svetoforlarda velosiped bölməsi – Polis cərimə yazmadıqca qayda pozanlar çoxalır - VİDEO

Aqil Rəhimov bildirib ki, yalnız məsafə saxlamaq kifayət etmir.

“Xüsusilə ön təkərləri sola çevrilmiş avtomobillər daha risklidir. Belə nəqliyyat vasitələri qəfil hərəkətə başlaya bilər. Bu səbəbdən həmin avtomobillərin yanından keçərkən sürətin azaldılması və ayağın tormoz üzərində saxlanılması tövsiyə olunur.

Əgər park edilmiş avtomobilin tormoz işıqları yanırsa, bu, sürücünün sükan arxasında olduğunu göstərə bilər və istənilən an tormuzu buraxaraq hərəkətə başlaya bilər. Bu cür hallarda diqqətli olmaq və mümkün riskləri əvvəlcədən qiymətləndirmək vacibdir”.

Aqil Rəhimov sürücüləri daha ehtiyatlı davranmağa, yol şəraitini düzgün analiz etməyə və öz təhlükəsizliklərini hər zaman ön planda saxlamağa çağırıb.

Eltac Zülfüqaroğlu