Dayanma-durmaya görə cərimə sərtləşdirilir; bal da yazılacaq

Dayanma-durma qaydalarının pozulmasına görə tətbiq edilən cərimənin məbləğinin artırılması gözlənilir. Avtosfer.az-ın əldə etdiyi məlumata görə, son zamanlar yollarda yaranan tıxac hamını narahat edir. Aparılan təhlillər nəticəsində məlum olub ki, ikinci-üçüncü cərgədə, səkidə, piyada keçidlərinin yaxınlığında, avtobus dayanacaqlarında dayanma-durma qaydasını pozan sürücülər tıxacın yaranmasına birbaşa təsir göstərir. Bu səbəbdən də həmin qayda pozuntusunun ciddiliyi ilə tətbiq edilən cərimənin məbləği arasında tərs mütənasiblik var. Ona görə də ikinci-üçüncü cərgədə dayanaraq hərəkəti çətinləşdirən, yolları keçilməz edən sürücülərin məsuliyyətə cəlb edilməsi ilə bağlı tətbiq edilən cərimələrin artırılmasına yaxın vaxtlarda baxılacaq.

Əldə etdiyimiz məlumata görə, bu qayda pozuntusunu törədən sürücülər üçün yeni layihədə kifayət qədər ağır cərimələr olacaq. Eyni zamanda, dayanma-durma qaydalarının daha kobud şəkildə pozulmasına görə cərimə balı da tətbiq ediləcək.

Qeyd edək ki, Prezident İlham Əliyev tərəfindən təsdiq edilən Yol hərəkəti təhlükəsizliyinə dair Dövlət Proqramında (2019-2023-cü illər) “Yol hərəkəti haqqında” qanunun yenilənməsi nəzərdə tutulur. Sözügedən yeniliklər yeni qanunda əksini tapacaq.

Fərid