Yolayrıcında qəzaya düşən avtomobil velosiped sürən uşağa çırpıldı - VİDEO

Türkiyənin Kocaeli vilayətinin Körfez rayonunda iki avtomobilin toqquşması nəticəsində baş verən yol qəzası azyaşlının xəsarət alması ilə nəticələnib.

Avtosfer.az xəbər verir ki, toqquşmanın təsirindən istiqaməti itirən avtomobil velosiped sürən uşağa çırpılıb. Hadisə anı digər avtomobilin kamerası tərəfindən saniyə-saniyə qeydə alınıb.

Qəza Körfez rayonunun Güney məhəlləsində, Sancak küçəsində baş verib. 34-HTF-103 dövlət nömrə nişanlı avtomobillə 41-K-4755 nömrəli nəqliyyat vasitəsi küçənin kəsişməsində toqquşub. 

Uşaq qısa müddət avtomobillə yol kənarında park edilmiş başqa bir maşın arasında qalıb. Hadisə yerinə dərhal polis və təcili tibbi yardım briqadaları cəlb olunub. İlk tibbi müdaxilədən sonra xəstəxanaya çatdırılan uşağın vəziyyətinin qənaətbəxş olduğu bildirilib.

Hadisə anını əks etdirən görüntülərdə avtomobilin uşağa çırpılması və ətrafdakı vətəndaşların dərhal köməyə qaçması aydın görünür.

Faktla bağlı araşdırmalara başlanılıb.

Eltac Zülfüqaroğlu