Güclü külək və yağışlarda təhlükəsizlik qaydalarına riayət olunmalıdır - EKSPERT

Son dövrlərdə müşahidə olunan güclü külək və intensiv yağışlar insanların gündəlik həyatına ciddi təsir göstərir və müxtəlif təhlükələr yaradır. Belə hava şəraiti nəqliyyatın hərəkətində çətinliklərə, elektrik enerjisinin kəsilməsinə, ağacların aşmasına və su basqınlarına səbəb ola bilir. Xüsusilə şəhər mühitində bu cür hallar həm infrastruktur, həm də insanların təhlükəsizliyi baxımından riskləri artırır. Bu səbəbdən güclü külək və leysan yağışlar zamanı düzgün davranış qaydalarına əməl etmək, qabaqlayıcı tədbirlər görmək və rəsmi qurumların xəbərdarlıqlarını nəzərə almaq olduqca vacibdir.
Məsələ ilə bağlı təhlükəsizlik eksperti Orxan Musayev Avtosfer.az-a açıqlamasında bildirib ki, güclü külək və intensiv yağış zamanı təhlükəli ərazilərdən uzaq durmaq və diqqətli davranmaq həyati əhəmiyyət daşıyır:

“Güclü külək və intensiv yağışlar zamanı müəyyən təhlükəsizlik qaydaları mövcuddur ki, onlara riayət etməklə insanlar öz həyat və sağlamlıqlarını qoruya bilərlər. Belə hava şəraitində xüsusilə binaların dibində dayanmaq tövsiyə olunmur. Küləkli və yağışlı hava zamanı reklam lövhələri, köhnə ağaclar və tikinti aparılan binaların ətrafı ən təhlükəli zonalar hesab olunur. Bu ərazilərdə hərəkət edərkən diqqət maksimum səviyyədə artırılmalıdır”.
Nurcan Babək