İnternetdə ucuz, mağazada baha: Bu, qanun pozuntusudur?

Eyni məhsulun internetdə və fiziki mağazada fərqli qiymətə satılması istehlakçılar arasında tez-tez müzakirə olunan məsələlərdəndir. Bəzi alıcılar bunu qanun pozuntusu kimi qiymətləndirsələr də, mövcud qanunvericilik sahibkarlara qiymət siyasətini müəyyən etmək üçün geniş imkanlar verir.

Bəs eyni məhsulun onlayn və mağazada fərqli qiymətə təklif edilməsi qanunidirmi?

Avtosfer.az-ın məlumatına görə, mövzu ilə bağlı Konkret.az-a danışan hüquqşünas Toğrul Məmmədov bildirib ki, Azərbaycan qanunvericiliyi sahibkarın məhsulu müəyyən etdiyi qiymətlə satmasını məhdudlaşdırmır.

Onun sözlərinə görə, dövlət tərəfindən qiyməti tənzimlənməyən məhsullar üzrə sahibkar qiymət siyasətini sərbəst müəyyən edə bilər:

“Qanunvericilikdə məhsulun daha yüksək və ya daha aşağı qiymətə satılması ilə bağlı ümumi məhdudiyyət nəzərdə tutulmayıb. Sahibkar dövlət tərəfindən qiyməti tənzimlənməyən məhsulları istədiyi qiymətə satışa çıxara bilər. Bu baxımdan eyni məhsulun internet mağazasında və fiziki satış nöqtəsində fərqli qiymətə təklif edilməsi qanun pozuntusu hesab olunmur.”

Hüquqşünas qeyd edib ki, istisna yalnız qiymətləri dövlət tərəfindən tənzimlənən məhsullara aiddir:

“Məsələn, dərman vasitələri kimi qiyməti dövlət tərəfindən müəyyən edilən məhsullarda sahibkar qiyməti öz istəyi ilə dəyişə bilməz. Belə hallarda müəyyən olunmuş tarif və qiymətlərə əməl edilməsi məcburidir.”

Toğrul Məmmədovun sözlərinə görə, buna görə də dövlət tərəfindən qiyməti tənzimlənməyən məhsulların internetdə və fiziki mağazada fərqli qiymətlə satılması hüquqi baxımdan mümkündür.