İranda vurulan təyyarənin qara qutusu Kiyevdə yanvarın 20-də açılacaq

“Beynəlxalq ekspertlər qrupu yanvarın 20-də İranda vurulan Ukrayna Beynəlxalq Hava Yollarına məxsus təyyarəsinin uçuş qeydlərini deşifrə etməyə başlayacaq”. 

APA TASS-a istinadən xəbər verir ki, bunu İrandan qayıtdıqdan sonra Kiyev Elmi-tədqiqat İnstitutunun direktoru məhkəmə eksperti Aleksandr Ruvin deyib.

"Vurulmuş “Boeing”in qara qutusunun deşifrə edilməsi Ukraynada aparılacaq. Yanvarın 15-də İran Aviasiya Bürosunun rəhbəri və bütün mütəxəssislər buraya gələcək”, - deyə A.Ruvin vurğulayıb. 

O, əlavə edib ki, DNT analizi üçün fəlakət qurbanlarının müəyyənləşdirilməsi davam edir: “İran prezidenti meyitlərin bütün qalıqlarının yanvarın 19-dək təhvil veriləcəyini bildirib”.

Qeyd edək ki, təyyarənin vurulduğu gün – yanvarın 8-də ukraynalı mütəxəssislərdən ibarət komissiya Tehrana gəlib. Yanvarın 9-da işə qrup qəza yerində işə başlayıb.