Kəlbəcərdə minaya düşən şəxslərin vəziyyəti açıqlandı - VİDEO - YENİLƏNİB

Dekabrın 14-ü saat 18:00 radələrində Kəlbəcər rayonunun Çıraq kəndi ərazisində mina partlayışı nəticəsində xəsarət alan Azərbaycan Ordusunun hərbi qulluqçuları Axundov Rza Yusif oğlu, Şirinov Murad İsa oğlu və İbişli Qabil Ədalət oğlunun hərbi tibb müəssisələrində həkimlərin nəzarəti altında müalicələri davam etdirilir.

Bu barədə Avtosfer.az-a Müdafiə Nazirliyindən bildirilib.

"Hər üç hərbçimizin həyati təhlükəsi yoxdur", MN-in məlumatında deyilir.

***

Xəbər verdiyimiz kimi, ötən gün Kəlbəcər rayonunun Çıraq kəndi ərazisində 8 nəfərin minaya düşüb. Hadisə nəticəsində yaralanan üç nəfər xəstəxanaya yerləşdirilib.

Gəncə Şəhər Birləşmiş Xəstəxanasının nəzdində olan Abbas Səhhət adına Xəstəxananın həkimi Ruhin Abuzərli qeyd edib ki, yaralılar Pənahov Radiq, Allahverdiyev Siyasət, Əliyarov Sadir xəstəxanaya ötən gün saat 05:30 radələrində daxil olublar: “Hazırda xəstələrin müayinə və müalicələri davam edir. Onların vəziyyəti orta-ağırdır”.

Avtosfer.az AzTV-nin yaralıların vəziyyəti ilə bağlı süjetini təqdim edir:  

***

TƏBİB-dən verilən məlumata görə, Kəlbəcərdə baş verən mina partlayışı zamanı xəsarət alan 3 nəfər (mülki vətəndaşlar olmaqla) Gəncə Şəhər Birləşmiş Xəstəxanasının nəzdində olan Abbas Səhhət adına xəstəxanaya təxliyə olunublar. 

15.12.2022-ci ildə saat 05:10 radələrində xəstəxanaya daxil olan şəxslərə zəruri tibbi xidmətlər göstərilib. Hazırda onlardan birinin müalicəsi Gəncə Beynəlxalq Xəstəxanasında davam edir. Vəziyyəti stabildir, sabah əməliyyat edilməsi nəzərdə tutulub. 

Xəsarət alan şəxslərdən ikisinin müalicəsinə isə Gəncə Şəhər Birləşmiş Xəstəxanasının nəzdində olan Abbas Səhhət adına xəstəxanada davam edilir. Vəziyyətləri stabildir. Xəsarət alanların diaqnozları sağ baldır sümüyünün və daban sümüyünün sınığı olub.