Avtomobilə taxılan üzlüklər qəza riskini artırır? – ARAŞDIRMA

Avtomobillərdə salonu təmiz və səliqəli saxlamaq məqsədilə istifadə olunan oturacaq üzlükləri gözlənilməz təhlükəsizlik riski yarada bilər. Xüsusilə yan hava yastıqları ilə təchiz edilmiş oturacaqlarda bu aksesuarlardan istifadə qəza zamanı hava yastığının düzgün açılmasına mane ola bilər.

Avtosfer.az xəbər verir ki, müasir avtomobillərin əksəriyyətində sürücü və sərnişinlərin qorunması üçün oturacaqların yan hissəsinə inteqrasiya edilmiş hava yastıqları mövcuddur. Yan tərəfdən toqquşma zamanı açılan bu sistemlər zərbənin insanlara təsirini azaltmaq məqsədi daşıyır.

Mütəxəssislərin sözlərinə görə, oturacağa keçirilən standart üzlüklər hava yastığının yerləşdiyi hissəni örtə və onun qəza zamanı nəzərdə tutulduğu kimi açılmasına mane ola bilər. Bu isə təhlükəsizlik sisteminin effektivliyini azalda bilər.

Bu səbəbdən avtomobil istehsalçıları yan hava yastığı ilə təchiz edilmiş oturacaqlarda uyğun olmayan üzlük və örtüklərdən istifadə edilməməsini tövsiyə edirlər.

Sürücülərə oturacaq üzlüyü alarkən onun konkret avtomobil modeli üçün nəzərdə tutulduğuna və yan hava yastıqlarının açılmasına mane olmadığına diqqət yetirmək tövsiyə olunur.

Eltac Zülfüqaroğlu