Bu nişanlar nəyi bildirir? - Təhlükəyə yaxınlaşan sürücülərin çoxu bunları bilmir - VİDEO

Paytaxtdan Zirə istiqamətində hərəkət edən sürücülər yolda tez-tez müxtəlif yol nişanları ilə qarşılaşırlar. Bu nişanların hər biri müəyyən xəbərdarlıq və ya tələb xarakteri daşıyır.

Avtosfer.az xəbər verir ki, xüsusilə dəmir yolu keçidlərinə yaxınlaşarkən qoyulan nişanlar həm yeni sürücülərin, həm də təcrübəlilərin diqqət yetirməli olduğu məqamlar sırasındadır. Bəs bu nişanlar nəyi bildirir və onlara görə hansı sürət həddi müəyyənləşdirilməlidir?

Mövzu ilə bağlı “Qəza əleyhinə kurslar”ın məşqçisi Aqil Rəhimov bildirib ki, Zirə yolunda sürət həddi 90 km/saatdır:

“Lakin dəmir yolu keçidinə yaxınlaşarkən sürəti mərhələli şəkildə azaltmaq tələb olunur. Üç xəttli nişan keçidə 150-300 metr qaldığını göstərir və sürəti 80 km/saat-a endirmək lazımdır. İki xəttli nişan isə məsafənin daha da azaldığını bildirir və burada sürət 60 km/saat olmalıdır.

Bir xəttli nişan isə keçidə cəmi 50 metr qaldığını göstərir. Əgər svetafor işləyirsə, yol nişanı qüvvədə olmur. Svetaforun ağ işığı yaşıl işığa bərabərdir. Qırmızı işıq yanıb-sönərsə, mütləq dayanmaq tələb olunur”.

Eltac Zülfüqaroğlu