Piyada keçidinə çatan sürücü nələrə diqqət etməlidir? – Mütəxəssis İZAH ETDİ - VİDEO

Yeni sürücülər üçün vacib tövsiyələrdən biri piyada keçidlərində diqqətli davranmaqdır. Qəza əleyhinə kursların məşqçisi Aqil Rəhimov bu mövzuya dair yayımlanan videoda sürücülərin tez-tez yol verdiyi bir məqama diqqət çəkib.

Avtosfer.az xəbər verir ki, Aqil Rəhimov sürücünün piyada keçidinə yaxınlaşarkən təkcə öz gördüyünə əsaslanmamalı, ətrafdakı nəqliyyat vasitələrinin davranışını da düzgün analiz etməsinin vacibliyini bildirib. Onun sözlərinə görə, piyada keçidində avtomobili qısa müddətlik saxlayaraq “getmə” tələbi irəli sürmək bəzən qəzanın qarşısını alan əsas amil olur. Çünki həmin anda görünməyən, lakin hər an yola çıxa biləcək piyadanın olması ehtimalı yüksəkdir.

Məşqçi qeyd edir ki, çox vaxt məhz bu cür hallarda saniyələr sonra piyadanın yola çıxdığı müşahidə olunur və yalnız bundan sonra hərəkətə davam etmək düzgün qərar sayılır. Aqil Rəhimov sürücülərə xüsusi olaraq belə bir məsləhət də verir: əgər sağ zolaqda hərəkət edən avtomobil piyadalar keçib qurtardıqdan sonra belə dərhal hərəkətə başlamırsa, bu, əlavə təhlükə əlaməti kimi qiymətləndirilməlidir. Belə vəziyyətlərdə sürücü bilməlidir ki, ehtimal ki, hələ yola çıxacaq başqa bir piyada var.

Mütəxəssis vurğulayır ki, bu cür detallara diqqət yetirmək xüsusilə yeni sürücülər üçün olduqca vacibdir və yol-nəqliyyat hadisələrinin qarşısının alınmasında mühüm rol oynayır.

Eltac Zülfüqaroğlu