Xətai prospektində kəsişmənin yeni sxemi necə işləyir? – AÇIQLAMA - VİDEO

Xətai prospektində, Təhsil Nazirliyinin qarşısında yol hərəkətinin təşkilində edilən dəyişikliklə bağlı müzakirələr aparılır.

Avtosfer.az xəbər verir ki, nəqliyyat eksperti Rüfət Əmiraslanov bildirib ki, sözügedən ərazidə dəyişikliklər həyata keçirilərkən kəsişmənin effektiv işləməyəcəyi ilə bağlı müəyyən narahatlıqlar var idi.

Ekspertin sözlərinə görə, həmin ərazidə küçələrin hərəkət istiqamətləri dəyişdirilərək kəsişmənin iki fazalı fəaliyyət göstərməsi təmin edilib. Eyni zamanda, həmin istiqamətdən gələn avtomobillərin hərəkəti Mirzə Qədim İrəvani küçəsi üzərindən təşkil olunub.

“Görünən odur ki, hazırda hər şey qaydasında işləyir. Kəsişmədə hərəkətin təşkili əvvəlki narahatlıqları doğrultmayıb və sistem normal fəaliyyət göstərir”, – deyə Rüfət Əmiraslanov qeyd edib.

Ekspert bununla yanaşı, ərazidə hərəkətin daha da rahatlaşdırılması üçün təklifini də səsləndirib. O bildirib ki, hazırda Mirzə Qədim İrəvani küçəsindən gələn avtomobillər üçün iki hərəkət zolağı mövcuddur.

“Sadəcə təklif kimi qeyd etmək olar ki, həmin küçədə iki zolağı üç zolağa çatdırmaq mümkün olsa, daha yaxşı olar. Bu, xüsusilə hərəkət intensivliyinin artdığı vaxtlarda nəqliyyat axınının daha rahat keçirilməsinə kömək edə bilər”, – deyə ekspert əlavə edib.

Eltac Zülfüqaroğlu